आइतबार जिल्ला विकास समिति र विपद् व्यवस्थापन समितिले सो क्षेत्रको स्थलगत अनुगमन गरेको थियो। शनिबार डुबानमा परेका क्षेत्रमा आइतबार बिहान आएको बाढी फेरि पसेर एकसय घर डुबाएको थियो।
गर्दी गाविसमा ३०० घर, बगौडा गाविसमा ३०० तथा कल्याणपुर र वसन्तपुर क्षेत्रका ५० घर डुबेको पाइएको जिविस प्रकोप व्यवस्थापन स्रोतव्यक्ति बलराम लुइँटेलले जानकारी दिए। सिँचाइका लागि बनाइएको ७०० मिटर कुलोसमेत बगेको छ।
तीन गाविसका ३५० बिघा बढी धानखेतीमा बाढी पसेको छ। कल्याणपुरको पाँचघर र अन्य क्षेत्रका आठ गरी १३ घरमा घरभित्रै बाढी पसेर क्षति पुर्याएको स्थानीयले बताएका छन्। अन्य घरहरू डुबानमा मात्रै छन्।
कल्याणपुर–४ मा चन्द्रे खोलामा आएको बाढीले ७१ घरको ६४ बिघामा लगाएको धानखेतीमा क्षति पुर्याएको छ। त्यसमध्येको १३ बिघा बगरमै परिणत गरिदिएको छ। पाँच घरमा मझेरीभन्दा एक फिटजति माथि बालुवा थुप्रिएको छ भने ती घरका बासिन्दाको बिचल्ली भएको छ।
बाँदरमुढे खोलाले पनि केही क्षति पुर्याएको स्थानीयले बताएका छन्। गर्दीकै लौगाई, नयाँ पर्सामा मात्रै १६३ घर डुबानमा परेको छ। बनकट्टा र चन्द्रपुरीमा १७ घर डुबेको छ।
त्यस्तै मगुई खोलाले गर्दी–५ को बैराठ, लौगाई, जीवनपुर र भैरवपुरमा लगाएको डेढसय बिघा धानखेतीमा बाढी पसेको स्थानीय मधुसूदन सुवेदीले बताए। वनकट्टास्थित रिउ नदीमा हालेको पुलनजिकैकौ करिब १२ मिटर सडक बाढीले बगाएको छ। २६० मिटर कच्ची सडक पनि क्षतिग्रस्त बनेको छ।
बाढीको आज प्रारम्भिक विवरण आए पनि पूर्ण विवरण आउन भने केही दिन लाग्ने जिविसका प्रकोप व्यवस्थापनका स्रोतव्यक्ति बलराम लुइँटेलले बताए। माडीको बाँदरमुढे खोलामा आएको बाढीले माडीमा आइतबार ६० वर्षीया इशारा विकको मृत्युभएको छ।
