कतारलाई विश्वकप आयोजना गर्न दिने फिफाको निर्णय एकपछि अर्को विवादमा

काठमाडौं, जेष्ठ २५  । सन् २०२२ को फुटबल विश्वकप आयोजना गर्न कतारलाई दिनेक्रममा ठूलो अनियमितता भएको भन्ने खबरसँगै विश्व फुटबलको सर्वोच्च संस्था फिफा विवादको घेरामा तानिँदै आएको छ । कतारले घूष खुवाएर निर्णय आफ्नो पक्षमा पारेको भन्ने खबर दिनानुदिन आउन थालेपछि फिफाका प्रायोजकहरुले तत्काल छानबीन गरी सत्यतथ्य बाहिर ल्याउन माग गरेका छन् ।
 फिफाको मूख्य प्रायोजक मध्येको एक सोनी कम्पनीले विश्वकपका लागि गरिएको टेण्डरका क्रममा गलत क्रियाकलाप भएको भन्नेबारे सही अनुसन्धान गरी सत्यतथ्य बाहिर ल्याउन फिफाका पदाधिकारीहरुसँग माग गरेका हुन् ।
द सन्डे टाइम्सले टेण्डर स्वीकृत गराउने समयमा कतारले सदस्य राष्ट्रहरुलाई अनुचित प्रभावमा पारेको प्रमाण एकपछि अर्को गर्दै सार्वजनिक गर्न थालेपछि फिफा पदाधिकारीहरु दबाबमा परेका हुन् ।
उक्त पत्रिकाले कतारका तात्कालीन फिफा उपाध्यक्ष मोहम्मद बिन हमामले निर्णय आफ्नो पक्षमा पार्न ३० लाख पाउण्ड सदस्य राष्ट्रका पदाधिकारीहरुलाई खुवाएको खुलासा गरेको थियो । भ्रष्टाचारको आरोप पुष्टि भए नयाँ आयोजक खोज्न सकिने फिफा अपाध्यक्षले यसअघिनै बताइसकेका छन् । सन् २०१० मा कतारलाई सन् २०२२ को वल्र्डकप गर्न दिने निर्णय गरिएको थियो ।