संभवत यो नेपाली सिनेमाका कुनै सेलिब्रेटीलाई दिएको सबैभन्दा महंगोे बिहे निम्तो हुनसक्छ । यस्तै भएको छ, नायक राजेश हमालको जीवनमा पनि । उनलाई सुरेन्द्र ठाकुर नाम गरेका हेयर डिजाइनरले आफ्नो बिहेमा हेलिकप्टर नै चार्टर गरेर बोलाएका छन् ।शुक्रबार नायक राजेश हमाल उनको बिहेमा सहभागी हुन सर्लाही पुगे । १ घन्टाका लागि हमाल उनको बिहेमा सहभागी भएका हुन् । तर मौसम खराबीका कारण हमाललाई काठमाण्डौ र्फकन ५ घन्टा लाग्यो । बिहेमा सहभागी हुन संचारकमीहरु सुवास ढकाल, प्रदिप निरौला र विदुर खतिवडा पनि हमालसँगै पुगे ।
अनलाइनखबरसँग कुरा गर्दै सुरेन्द्रले आफूले १ लाख ६० हजार तिरेको बताए । मौसम खराब भएका कारणले ५ घन्टा लागेको भन्दै केही बढी रकम त मागिएको थियो, तर राजेश दाइले आफूहरु सही ठाउँमा नपुगेको भन्दै रकम बढी नलिन भनेपछि कुरा मिलेको सुरेन्द्रले बताए ।
उनले राजेश हमाल आफ्नो परिवारको जस्तो मानिस भएको र उहाँको सम्मानका लागि नै हेलिकप्टर चार्टर गरेको बताए । २० गते आफ्नो बिहेका लागि हमालले सुटिङ समेत छोडेको उनले बताए । ‘उहाँले मलाई हरेक कुरामा सहयोग गर्नु भएको छ, म उहाँको घरमै गएर कपाल काट्छु’, सुरेन्द्रले भने । सर्लाही पुगेर हमालले सुरेन्द्रलाई बिहेको बधाई दिएका थिए ।
हेलिकप्टर चार्टर गरेर बिहेमा सहभागी भएका हमालको चर्चा यतिबेला खुबै छ ।
.jpg)
