पहिरोले पृथ्वी राजमार्ग अवरुद्ध, सयौं सवारीसाधन जाममा

२२ बैशाख, काठमाडौं । पृथ्वी राजमार्ग अन्तर्गत धादिङको जोगिमारा र चितवनको फिस्लिङमा गएको पहिरोले राजमार्ग अवरुद्ध भएको छ । धादिङको जोगीमारा, चितवनको फिसलिङ तथा मुङलिन-नारायणघाटअन्तर्गत राजमार्गको जुगेडीसडकखण्डमा आज बिहान पहिरो गएपछि सो मार्ग भएर काठमाडौँ भित्रिने सवारी साधन सञ्चालन हुन नसकेको जिल्ला ट्राफिक प्रहरी कार्यालय चितवनका प्रमुख रामचन्द्र घिमिरेले जानकारी दिए ।

उनले काठमाडौँबाट बाहिरिने गाडी जोगीमारामा तथा बाहिरबाट काठमाडौँ आउने सवारी साधन जुगेडीमा अवरुद्ध भइरहेको बताउँदै पहिरो पन्छाउने कार्य जारी रहेकाले केही समयपछि एकतर्फी भए सवारी साधन सुचारु गरिने बताए । महानगरीय ट्राफिक प्रहरी प्रभाग नागढुङ्गाका प्रहरी नायब निरीक्षक उपेन्द्रबहादुर बुढाथोकीले त्यस क्षेत्रमा ठूलो पहिरो गएकाले सडक अवरुद्ध भई यातायात सुचारु हुन नसकेको बताए । पृथ्वी राजमार्ग हुँदै दैनिक करिब चार हजार सवारी साधनबाट करिब १२ हजार यात्रु आवतजावत गर्ने गर्छन् । रासस