'असार २४ पछि पनि एमालेमै बस्नुपर्छ भन्ने सम्झिनुस'
१७ जेठ, काठमाडौं । नेकपा एमालेको नवौं महाधिवेशनमा प्यानल बनाएर चुनावमा भिडेका नेताहरुले एक अर्कोलाई व्यक्तिगत लाञ्छाना लगाउने क्रम बढेको भन्दै युवा नेता गोकर्ण विष्टले संयम अपनाउन दुवै पक्षलाई आग्रह गरेका छन् । माधव नेपालको उम्मेदवारी घोषणासभामा बोल्न उभ्याइएका केन्द्रीय सदस्य एबम् पूर्वमन्त्री बिष्टले बिचार नमिल्दैमा कुनै नेतालाई गाली नगरौं भन्दै मर्यादित बहस गर्न आग्रह गरे । ‘यहाँ आफ्नै पार्टीका नेतालाई होच्याउने, गाली गर्ने र घृणा गर्ने सम्मका कुरा आइरहेका छन्’ विष्टले भने-’स्वस्थप्रतिस्पर्धा गरौं, असार २४ पछि पनि यहि पार्टीमा बस्ने हो ।
आरोप प्रत्यारोप नगरौं ।’ उर्जामन्त्री भएका बेला लोकप्रिय काम गरेर युवा पंक्तिमा स्थापित नेता बिष्टले कम्युनिस्ट पार्टीमा मन मिल्दा जे पनि ठिक र मन नमिल्दा सास पनि गन्हाउने रोग रहेको भन्दै एमालेमा अब यस्तो संस्कार हटाउनुपर्ने बताए । विष्ट बोल्नुअघि केन्द्रीय सदस्य परशुराम मेघी गुरुङले ‘दक्षिणतिर लभ परेका नेता केपी ओली होइन, नेपाली जनतासँग लभ परेका माधव नेपाललाई अध्यक्ष बनाउनुपर्ने बताएका थिए । अन्य केही नेताले पनि ओलीप्रति लक्षित गर्दै गणतन्त्र विरोधी नेता भनेपछि बिष्टले सबै नेताप्रति शिष्टता कायम राख्न आग्रह गरेका हुन् । अर्का नेता घनश्याम भुषालले पनि व्यक्तिभन्दा बिचारको बहस गर्नुपर्ने बताए ।
