तेरीयाको स्वागतमा उर्लिए रुपन्देहीबासी (फोटोसहित)

२२ जेठ, भैरहवा । भारतीय च्यानल जीटीभीमा प्रसारण भइरहेको डान्स इन्डिया डान्स लिटिल मास्टर्सको अन्तिम पाँचमा छनोट नेपालकी छोरी तेरिया फौजा मगर गृहजिल्ला रुपन्देही आइपुग्दा भव्य स्वागत भएको छ ।  मुम्बईबाट काठमाडौं हुँदै यती एअरलाइन्समा भैरहवा आएकी तेरियासहित जिटिभिको टोलीलाई भैरहवाको गौतमबुद्ध विमानस्थलमा संघसंस्था र तेरियाका आफन्त तथा शुभेच्छुकले स्वागत गरेका हुन् ।

चार महिनाअघिदेखि मुम्बईमा रहेकी नेपाली छोरी तेरिया अन्तिम पाँचमा छनोट भएपछि रुपन्देहीमा नृत्य छायांकनका लागि जीटीभीको टोलीसहित गृहजिल्ला आएकी हुन् । १४ वर्षसम्मका झन्डै चार लाख बालबालिकाले भाग लिएको प्रतियोगितामा छनोट ४० हजार प्रतिस्पर्धीलाई पछि पार्दै उनी अन्तिम पाँचमा पुगेकी हुन् ।  बागेश्वरी संगीतालय बुटवलकी प्रशिक्षार्थी तेरियाले नेपालमा रहँदा आफ्नो नृत्य प्रस्तुत गर्दै आफूलाई विजयी बनाउन भोट माग्ने कार्यक्रम रहेको बागेश्वरी संगीतालयका प्राचार्य सुरेश सेन्चुरीले जानकारी दिए ।

भैरहवाबाट बुटवल र जन्मगाउँ रुद्रपुर पुग्दासम्म उनको स्वागतमा हुने सबै गतिविधिको छायांकन र प्रसारण हुने भएकाले तेरियाको स्वागतका लागि विभिन्न संघसंस्था र तेरियाका आफन्त तथा शुभेच्छुकहरु उपस्थित थिए ।  डीआईडी लिटिल मास्टर्सको उपाधि विजेताले ५० लाख भारु नगद र कारलगायतका उपहार प्राप्त गर्नेछन् । चार महिनादेखि जारी प्रतियोगिताको अन्तिम प्रतिष्पर्धा असार १ गते हुनेछ ।

भिडियो हेर्नुहोश