ताप्लेजुङ, वैशाख २० । ताप्लेजुङको पाथिभरा क्षेत्रमा बैशाख महिनामा पनि हिउँ परेपछि हिउँ खेल्न जानेहरुको भिड बढ्न थालेको छ । पाथिभरा मन्दिर परिसरदेखि माथिल्लो फेदिसम्म एक फिटसम्म हिमपात भएपछि सदरमुकाम फुङ्लिङ, छिमेकी जिल्ला पाँचथर र तेह्रथुमका विभिन्न स्थानबाट हिउँ खेल्न जाने युवायुवतीको भिड लाग्न थालेको पाथिभरा मन्दिरका पुजारी डिल्ली आचार्यले जानकारी दिए ।तल्लो क्षेत्रमा गर्मि बढेकोले गर्दा पनि हिउँमा रमाउनेहरुको संख्या बढेको उनको भनाइ छ ।
प्राय चैत्र महिनासम्ममा हिउँ पर्ने यस स्थानमा यो वर्ष बैसाख मध्यसम्म पनि हिउँ परिरहेको छ । गर्मीको समयमा हिमपात भए सँगै पाथिभरा मन्दिरमा दर्शन गर्न जाने बृद्धबृद्धा र बालबालिकालाई असहज भए पनि युवाहरु भने हिउँमा फोटो खिच्न र रमाउन व्यस्त देखिन्छन् ।
